Cwsmer cyntaf cyswllt cysylltiadau hynod gyflym newydd – Rhwydwaith cysylltiadau hynod gyflym newydd ar draws Gogledd Cymru yn denu’i gwsmer cyntaf.

Fibrewales ym Mharc Busnes Llanelwy yw’r busnes cyntaf i gysylltu i gebl £30 miliwn FibreSpeed. Bydd yn darparu gwasanaethau cyswllt a chefnogaeth ar gyfer sefydliadau eraill sydd eisiau cysylltu â’r grym a’r hyblygrwydd enfawr sy’n cael ei gynnig gan y rhwydwaith.

Os bydd digon yn manteisio arno, bydd Fibrewales yn ehangu ac yn cyflogi rhagor o staff.

Fibrewales yw enw masnachu Internet Engineering Limited sydd hefyd yn gweithredu busnes Darparydd Gwasanaeth Rhyngrwyd o’r enw Hosting UK, gyda chwsmeriaid yn y Deyrnas Unedig ac ar draws y byd.

Mae’r costau is y cyswllt hynod gyflym yn ei alluogi i gynyddu elw tra'n darparu rhychwant ehangach o wasanaethau ar gyfer cwsmeriaid presennol a chyflwyno gwasanaethau newydd i sefydliadau ar draws Gogledd Cymru.

Mae rhwydwaith ffibr opteg 200 milltir FibreSpeed yn rhyng-gysylltu â rhwydweithiau hynod gyflym eraill ac yn rhedeg mor bell â Chaergybi trwy 13 o barciau busnes allweddol ar draws Gogledd Cymru. Mae busnesau y tu allan i’r parciau hyn hefyd yn gallu cysylltu drwy ddefnyddio cylchoedd mynediad lleol i’w cysylltu â rhwydwaith FibreSpeed.

Meddai Phil Parry Cyfarwyddwr Rheoli Fibrewales: “Mae FibreSpeed yn gyffrous iawn oherwydd bod ganddo gymaint o botensial.

“Mae gan Ogledd Cymru gysylltiadau cludiant gwych gyda’r A55, ond tan heddiw roedd ei seilwaith cyfathrebu ymhell ar ôl llawer o’r Deyrnas Unedig.

“Mae hynny wedi bod yn anfantais i fusnesau presennol a chwmnïau a oedd yn dymuno ail leoli i’r ardal.

“Gyda dyfodiad FibreSpeed, nid dyna’r achos mwyach.

“Rydym wedi ymestyn ein rhwydwaith yn y DU yn ystod 2007 a 2008, gan gysylltu ein canolfannau data yn Llundain a Manceinion. Gyda FibreSpeed rydym erbyn hyn yn gallu ymestyn ein rhwydwaith ar draws Gogledd Cymru.

“Yn fy marn i mae’r rhwydwaith newydd nid yn unig yn ein rhoi ar yr un lefel ag ardaloedd eraill yn y Deyrnas Unedig ond mewn rhai achosion yn ein rhoi ar y blaen. Mae’n anodd gweld unrhyw resymau pam na ddylai busnes buddsoddi yma.

“Dyma ble daw Fribrewales i’r adwy, byddwn ymysg y darparwyr gwasanaeth cyntaf i gynnig a chefnogi gwasanaethau i fusnesau.”

Mae rhwydwaith FibreSpeed yn ben llanw partneriaeth rhwng menter breifat a Llywodraeth Cynulliad Cymru.

Meddai Ieuan Wyn Jones Dirprwy Brif Weinidog:  “FibreSpeed yw'r rhaglen gyntaf o'i fath yn y DU - sydd yn cefnogi arloesedd, menter a buddsoddiad mewnol ar adeg pan rydym yn wynebu her economaidd enfawr. Mae’n dangos unwaith eto effaith bositif ein rheolaeth o Gronfeydd Strwythurol Ewropeaidd.

“Rwy’n falch iawn o groesawi’n cysylltiad busnes gyntaf – ac yn edrych ymlaen at lawer mwy", meddai Mr Jones, sy’n Weinidog dros yr Economi a Thrafnidiaeth.

Mae Llywodraeth Cynulliad Cymru'n amcangyfrif y gallai buddion economaidd net FibreSpeed ledled gogledd Cymru arwain at gynnydd o hyd at £29 miliwn y flwyddyn yn y Gwerth Gros Ychwanegol am bob un o’r deg mlynedd nesaf.

Mae Mr Parry’n honni y bydd sefydliadau Gogledd Cymru sy’n prydlesu llinellau ar gyfer y rhyngrwyd, trosglwyddo data a’r ffôn ar hyn o bryd, yn arbed miloedd o bunnoedd y flwyddyn drwy gysylltiad ffibr opteg.

Meddai: “Mi wn fod sefydliadau gyda llinell 2 megabit ar brydles i Warrington ac i Lerpwl yn gallu talu rhywbeth fel £24,000 y flwyddyn.

“Drwy ddefnyddio’r rhwydwaith newydd gallwn ddarparu gwasanaeth Rhyngrwyd dynodedig o 100mbs am £17,000 - arbediad o £7,000 a’r fantais o wasanaeth rhyngrwyd dynodedig llawer cyflymach a mwy o led band y gellir darparu gwasanaethau ychwanegol drosti.